ଆଜି ଆମେ ଏମିତି ଏକ ବିଷୟରେ ଆଲୋଚନା କରିବାକୁ ଯାଉଛୁ ଯାହା ଶୁଣିଲେ ଆପଣଙ୍କୁ ହସ ଲାଗିପାରେ କିନ୍ତୁ ଏହା ଏକ ରୋଗ । ବାୟୁଦୋଷ ବା ପାଡ ? ଶୁଣିବାକୁ ହସ ଲାଗିଲେ ମଧ୍ୟ ଏହା ପଛରେ ରହିଛି ଅନେକ ବୈଜ୍ଞାନିକ କାରଣ ।
ତେବେ ଆସନ୍ତୁ ପାଡ଼ ବା ବାୟୁଦୋଷ ବିଷୟରେ ବିସ୍ତୃତ ଭାବରେ ବୁଝିବା।
ପାଡ଼ କ’ଣ?
ଆମେ ଖାଦ୍ୟ ଖାଇବା ପରେ ତାହା ପାଚନତନ୍ତ୍ର ଦେଇ ଯାଏ। ଏହି ସମୟରେ ଖାଦ୍ୟର କିଛି ଅଂଶ ଛୋଟ ଅନ୍ତନଳୀରେ ସମ୍ପୂର୍ଣ୍ଣ ହଜମ ନହୋଇ ବଡ଼ ଅନ୍ତନଳୀକୁ ପହଞ୍ଚେ। ସେଠାରେ ଥିବା ଅନେକ ପ୍ରକାରର ବ୍ୟାକ୍ଟେରିଆ ବା ଜୀବାଣୁ ଏହି ଅବଶିଷ୍ଟ ଖାଦ୍ୟକୁ ଭାଙ୍ଗିବା ସମୟରେ ବିଭିନ୍ନ ଗ୍ୟାସ୍ ତିଆରି କରନ୍ତି। ଏହି ଗ୍ୟାସ୍ ମଳଦ୍ୱାର ଦେଇ ବାହାରିଲେ ତାହାକୁ ପାଡ଼ କୁହାଯାଏ।
ଏବେ ଆପଣଙ୍କ ମନକୁ ନିଶ୍ଚିତ ପ୍ରଶ୍ନ ଆସୁଥିବ ପେଟରେ ଗ୍ୟାସ୍ କେଉଁଠାରୁ ଆସେ?
ଗ୍ୟାସ୍ର ମୁଖ୍ୟତଃ ଦୁଇଟି ଉତ୍ସ ରହିଛି। ଆମେ ଗିଳୁଥିବା ବାୟୁ ଓ ଅନ୍ତନଳୀରେ ତିଆରି ହେଉଥିବା ଗ୍ୟାସ ବା ବାୟୁ
ଖାଇବା, ପିଇବା କିମ୍ବା କଥା କହିବା ସମୟରେ ଅଳ୍ପ ପରିମାଣର ବାୟୁ ଆମ ପେଟକୁ ଯାଏ। ଶୀଘ୍ର ଖାଇଲେ, ଚୁଇଂଗମ୍ ଚୋବାଇଲେ, ଷ୍ଟ୍ରରେ ପାନୀୟ ପିଇଲେ କିମ୍ବା କାର୍ବୋନେଟେଡ୍ ପାନୀୟ ପିଇଲେ ଅଧିକ ବାୟୁ ଶରୀର ମଧ୍ୟକୁ ଯାଇଥାଏ। ଯାହା ଫଳରେ ପେଟ ଫୁଲିବା ବା ଫମ୍ପେଇବା ଭଳି ଅନୁଭୂତ ହୁଏ ।
ସେହିଭଳି ବଡ଼ ଅନ୍ତନଳୀର ଜୀବାଣୁ ହଜମ ହୋଇନଥିବା ଖାଦ୍ୟ ବା କାର୍ବୋହାଇଡ୍ରେଟ୍ ଓ ଫାଇବର୍କୁ ଭାଙ୍ଗିବା ବେଳେ ଗ୍ୟାସ୍ ଉତ୍ପାଦନ କରନ୍ତି। ଏହା ପାଡ଼ର ଏକ ବଡ଼ କାରଣ।
ଗ୍ୟାସ୍ ସୃଷ୍ଟିକାରୀ ଖାଦ୍ୟ ମଧ୍ୟ ପାଡ ବା ବାୟୁ ସୃଷ୍ଟି କରିବାରେ ସାହାଯ୍ୟ କରେ ।
କିଛି ଖାଦ୍ୟ ଅନ୍ତନଳୀରେ ଅଧିକ ଗ୍ୟାସ୍ ତିଆରି କରିପାରେ।
ମୂଳା , କୋବି , ଚେନାଚୁର , ଡାଲି , ଛୋଲା , ରସୁଣ , ବିରି ,ବିନ୍ସ , ପିଆଜ , ଅଧିକ ଫାଇବର୍ ଥିବା ଖାଦ୍ୟ
ଏହି ଖାଦ୍ୟ ଖରାପ ନୁହେଁ; କିନ୍ତୁ କେତେକ ଲୋକଙ୍କଠାରେ ଏଗୁଡ଼ିକ ଅଧିକ ଗ୍ୟାସ୍ କରିପାରେ।
ଏକାଥରେ ବହୁତ ଖାଦ୍ୟ ଖାଇଲେ ପାଚନତନ୍ତ୍ର ଉପରେ ଅଧିକ ଚାପ ପଡ଼େ ଏବଂ ଗ୍ୟାସ୍/ପେଟ ଫୁଲିବା ବଢ଼ିପାରେ।
ତରତରିଆ ଖାଇଲେ ଅଧିକ ବାୟୁ ଗିଳିହୁଏ। ଏହାର କିଛି ଅଂଶ ଡକାର ଭାବରେ ଓ କିଛି ଅଂଶ ଅନ୍ତନଳୀ ଦେଇ ପାଡ଼ ଭାବରେ ବାହାରିପାରେ।
କେତେକ ଲୋକଙ୍କ ଶରୀରରେ ଲ୍ୟାକ୍ଟେଜ୍ ନାମକ ଏନ୍ଜାଇମ୍ କମ୍ ଥାଏ। ଫଳରେ କ୍ଷୀରର ଲ୍ୟାକ୍ଟୋଜ୍ ସଠିକ୍ ଭାବରେ ହଜମ ହୋଇନପାରେ। ଏଥିରୁ ପେଟ ଫୁଲିବା, ପାଡ଼ ଓ ପେଟ ମୋଡ଼ିବା ହୋଇପାରେ।
ମଳ ବା ଝାଡା ଅନ୍ତନଳୀରେ ଅଧିକ ସମୟ ରହିଲେ ପେଟ ଫୁଲିବା ଓ ଗ୍ୟାସ୍ ବଢ଼ିବା ଅନୁଭବ ହୋଇପାରେ।
ବର୍ତ୍ତମାନ ଆସନ୍ତୁ ଜାଣିବା ପାଡ଼ର ପ୍ରକାରଭେଦ
ପାଡ଼ର କୌଣସି ଚିକିତ୍ସାବିଜ୍ଞାନୀୟ “ପ୍ରକାରଭେଦ” ତାଲିକା ନାହିଁ। କିନ୍ତୁ କାରଣ, ଗନ୍ଧ ଓ ଲକ୍ଷଣ ଅନୁସାରେ ଏହାକୁ ବୁଝାଯାଇପାରେ
୧.ଗନ୍ଧହୀନ ପାଡ଼
ଅନ୍ତନଳୀରେ ଥିବା ନାଇଟ୍ରୋଜେନ୍, ଅକ୍ସିଜେନ୍, କାର୍ବନ୍ ଡାଇଅକ୍ସାଇଡ୍, ହାଇଡ୍ରୋଜେନ୍ ଓ ମିଥେନ୍ ଭଳି ଗ୍ୟାସ୍ ଥାଇପାରେ। ଏଗୁଡ଼ିକ ସାଧାରଣତଃ ନିଜେ ତୀବ୍ର ଦୁର୍ଗନ୍ଧ ସୃଷ୍ଟି କରେନାହିଁ।
୨.ଦୁର୍ଗନ୍ଧଯୁକ୍ତ ପାଡ଼
କେତେକ ଗନ୍ଧଯୁକ୍ତ ସଲ୍ଫର୍ ଯୌଗିକ ଅତି ଅଳ୍ପ ପରିମାଣରେ ଥିଲେ ମଧ୍ୟ ପାଡ଼ରେ ତୀବ୍ର ଗନ୍ଧ ହୋଇପାରେ। ଏହା କୌଣସି ରୋଗର ଲକ୍ଷଣ ନୁହେଁ।
୩.ବାରମ୍ବାର ପାଡ଼
ଯଦି ନିୟମିତ ଭାବେ ଅତ୍ୟଧିକ ପାଡ଼ ହେଉଛି, ତେବେ ଖାଦ୍ୟ ଅନିୟମିତତା, କୋଷ୍ଠକାଠିନ୍ୟ, ଅଧିକ ବାୟୁ ଗିଳିବା ଇତ୍ୟାଦି କାରଣ ଥାଇପାରେ।
୪ପେଟ ଫୁଲିବା ସହିତ ପାଡ଼
ଗ୍ୟାସ୍ ଅଧିକ ଜମିଲେ ପେଟ ଭରାଭରା ବା ଫୁଲିଥିବା ଲାଗିପାରେ।
ପାଡ଼ର ଗନ୍ଧ କାହିଁକି ହୁଏ?
ଏହା ଏକ ମଜାଦାର କଥା—ପାଡ଼ର ଅଧିକାଂଶ ଗ୍ୟାସ୍ ଗନ୍ଧହୀନ। ଅତି ଅଳ୍ପ ପରିମାଣର କିଛି ରାସାୟନିକ ଯୌଗିକ, ବିଶେଷକରି ସଲ୍ଫର୍ ଥିବା ଯୌଗିକ, ଦୁର୍ଗନ୍ଧର ମୁଖ୍ୟ କାରଣ ହୋଇପାରେ। ତେଣୁ ପାଡ଼ର ଗନ୍ଧ ଯେତେ ଅଧିକ, ଗ୍ୟାସ୍ର ପରିମାଣ ମଧ୍ୟ ସେତେ ଅଧିକ—ଏହା ଠିକ୍ ନୁହେଁ।
୬. ପାଡ଼ କମାଇବା ପାଇଁ କ’ଣ କରିବେ?
ଧୀରେ ଧୀରେ ଖାଆନ୍ତୁ। ଖାଦ୍ୟକୁ ଭଲ ଭାବରେ ଚୋବାନ୍ତୁ। ଅତ୍ୟଧିକ ଖାଇବା ଏଡ଼ାନ୍ତୁ। କାର୍ବୋନେଟେଡ୍ ପାନୀୟ କମାନ୍ତୁ। ଆପଣଙ୍କୁ କେଉଁ ଖାଦ୍ୟରେ ଅଧିକ ଗ୍ୟାସ୍ ହେଉଛି ଧ୍ୟାନ ଦିଅନ୍ତୁ। କୋଷ୍ଠକାଠିନ୍ୟ ଥିଲେ ତାହାର ସମାଧାନ କରନ୍ତୁ। ନିୟମିତ ଚାଲିବା/ଶାରୀରିକ କାର୍ଯ୍ୟକଳାପ କରନ୍ତୁ। ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି ଡାଲି ଓ ଫାଇବର୍ ଯୁକ୍ତ ଖାଦ୍ୟ କେବଳ ଗ୍ୟାସ୍ ହୁଏ ବୋଲି ସମ୍ପୂର୍ଣ୍ଣ ବନ୍ଦ କରିବା ଠିକ୍ ନୁହେଁ।
କେତେବେଳେ ଡାକ୍ତରଙ୍କୁ ଦେଖାଇବେ?
ପାଡ଼ ସହିତ ଲଗାତାର କିମ୍ବା ତୀବ୍ର ପେଟବଥା ହେଲେ , ମଳରେ ରକ୍ତ ପଡ଼ିଲେ, ଅକାରଣରେ ଓଜନ କମିଲେ
ଦୀର୍ଘ ସମୟ ଧରି ଗୁରୁତର କୋଷ୍ଠକାଠିନ୍ୟ ହେଲେ
ବାରମ୍ବାର ବାନ୍ତି ଓ ପେଟ ଅତ୍ୟଧିକ ଫୁଲିଯିବା ଭଳି ଲାଗିଲେ ତୁରନ୍ତ ଡାକ୍ତରଙ୍କୁ ପରାମର୍ଶ କରନ୍ତୁ ।